ديما اللي معايا هو خيال حلم عمره مابيتحقق..بالظبط زي تراب
الفرن اللي حدانا في الدار ...تولع فيه النار تطيب الاكل ولما
نزهدها نطفيها بشويه تراب ... لما قالولي من سنين خلاص
ياحلوه كفايه عليكي كده علام ..اقعدي ساعدي امكـ في الدار
..املي مايه واكلي الطيور ..وحضري الاكل لاخوكي الكبير ...ما
استغربتش اصل ده شغلت البنت حدانا في البلد ..كنت اصحي من
الفجريه وكل الناس نايمين وكأني خلفتهم من سنين ضفايري
غطاها التراب ..وعيوني سكنها الوجع ..الله وهيه البنت من إمتي
حدانا ليها كلام .إسمعي يابت واقفلي حنكـ
ولو مش عاجبكـ إياكـ اسمع صوتك ..مفيش غير حاضر وايوه
وفي المغربيه ارمي نفسي علي إي فرشه ..إتخمد من تعب اليوم
صرخه جوايا عايزة تقول ااااااااااااااايه انا مش شغاله عندكم لكن
سكت وكملت الحكايه بعد سنين لما جت إمي وقالت يالا يابت
حضري نفسكـ جالكـ عريس ..الفاتحه بكره والدخله علي العيد
..سكت ولا سمعوا حتي رائيي اقول إيوه او إقول لا...كل اللي قلته
حاضر ...ويوم الدخله الصبح
ولعت الفرن وحضرت لهم الاكل ...وجهزت الجبنه زي كل يوم
وقرب العصريه جابولي الوليه ام عفاف تلبسني الفستان وتسرحني
وتفكـ ضفايري ....وجيه العريس خدني علي بيته والله زي ما أكون
مش بني ادم ولا كأني انسيه ...ويوم في يوم جم الولاد بدل العيل
سته ولا لا بقدر اقول غير حاضر وإيوه ماهو ده سلو بلادنا .
.قولي حاضر يابت وردي عليهم قولي إيوه ..حمدت ربنا ان السته
مافيهم بنايه ..إصل في بلدنا مابيحبوا غير الصبيان ..ويغنوا لهم
يقولوا(( لما قالوا ده ولد شد ظهر امه وفرد))الغريبه بقي إن ظهري
ما اتفرد بالعكس فضل ماتني ومكسور
فضل جوايا حلم بدل قعدتي قدام الفرن وصحياني من الفجريه
اعجن واخبز والت العجين كان نفسي اقعد قدام كتاب في المدرسه
زي بتوع مصر ..كان نفسي بدل ما اشيل الميه في بستله علي
راسي افتح حنفيه تنزل منها الميه ..بس فضل كل ده حلم
جوايا اصلنا غلابه اووي والراجل اللي إجوزته فضل غريب عني
وكأني ما اعرفوش كل اللي بيجمعني بيه الاكل وتربيه العيال اللي
بعد سنين بقوا رجاله ..وكاني غريبه عنهم وماإعرفهمش ..إعرفهم
ازاي وانا عمري ماقلت في حياتي غير حاضر وإيوه ...بقيت افرد
ضفايري واتحسر علي بنت تاني كان نفسي تكون انا مش ديه
..وراجل بجد مش الراجل اللي قدامي وحديا في الدار ديه ..وفضل
اللي اقدر اعمل حاضر وكلمه إيوه
...عسسوله 15_6_2014
ليست هناك تعليقات:
إرسال تعليق